Hver er hver?

   Þeir sem vald hafa á hinni hlutlægu vísindalegu aðferð þekkja upphefð sína og kalla sig hugvísindamenn; orð eru dýr; þeir hafa sjálfir skipað sér á bekk með náttúruvísindafólki í flokk drottnara þeirra gjafa, sem náttúran gefur. Althusser segir á völdum stað: „Hugmyndafræði er mynd af ímynduðum tengslum einstaklinga við raunveruleg tilvistarskilyrði þeirra”. Hver er þessi flokkur manna? Seifbornir, ráðagóðir, goðumlíkir? Hvað gengur þeim til með einni saman nafngiftinni? Auðvelda sjónhverfingar leikinn? Hefur innvígðum, segjum, tekist að hreinsa mannorð Galdra Möngu, Stokkseyrar- Dísu, flett ofan af prettum Arness sauðaþjófs eða eitthvað viðlíka í krafti galdrastafsins? Laertessonur bundinn við sigluna var bandingi hvers? Eigin fylgifiska, upphefðar, afglapa?

Robert Musil (1880-1942). Hver var hann í félagi við Gustav Mahler (1860-1911) og Sigmund Freud (1856-1939) í Vínarborg upp úr aldamótunum 1900? Der Mann ohne Eigenschaften er mikill doðrant, skáldsaga sem honum auðnaðist ekki að ljúka fyrir andlátið. Samt mikill fengur.